Bilang paghahanda sa pagbubukas ng bagong School Year sa Hunyo 8, 2026, malinaw ang direktiba ni Pangulong Ferdinand R. Marcos Jr.: Tiyaking handa ang mga pampublikong paaralan at mapangalagaan ang kapakanan ng mga mag-aaral.
Habang puspusan ang pagsasaayos ng mga silid-aralan sa pamamagitan ng Brigada Eskwela, pinalalakas naman ng PhilHealth ang proteksiyong pangkalusugan para sa mga mag-aaral, guro, at kawani ng Department of Education (DepEd) sa pamamagitan ng YAKAP.
Sa tulong ng YAKAP, mas napapalapit sa mga paaralan at komunidad ang mahahalagang serbisyong pangkalusugan. Dahil dito, mas maagang natutukoy at natutugunan ang mga karamdaman, na nakatutulong upang mabawasan ang pagliban ng mga mag-aaral sa klase at ng mga magulang sa trabaho dahil sa sakit ng kanilang mga anak.
Kabilang ang mga paaralan sa mga prayoridad na lugar ng implementasyon ng YAKAP upang habang bata pa lamang ay magkaroon na ang mga mag-aaral ng regular na gabay mula sa kanilang napiling Primary Care Provider tungkol sa pangangalaga ng kanilang kalusugan. Sa pamamagitan ng mas madaling access sa mga serbisyong pangkalusugan, mas makapagpopokus sila sa kanilang pag-aaral.
Sa kasalukuyan, 66 paaralan na ang nakinabang sa YAKAP, na may kabuuang 7,084 na mga benepisyaryong mag-aaral, guro, at kawani. Inaasahang madaragdagan pa ang bilang na ito sa mga susunod na araw sa patuloy na pagtutulungan ng PhilHealth at DepEd upang maisulong ang mas malusog na komunidad ng mga mag-aaral.
Sa ilalim ng YAKAP, maaaring makatanggap ang mga benepisyaryo ng konsultasyon, mga kinakailangang laboratoryo at diagnostic procedures, at mga gamot batay sa pagsusuri at rekomendasyon ng kanilang Primary Care Provider.
Ayon kay PhilHealth President and CEO Dr. Edwin M. Mercado, “Ang aming pakikilahok sa Brigada Eskwela ay higit pa sa paghahanda ng kanilang kapaligiran. Layunin naming makabuo ng isang matibay na proteksyong pangkalusugan para sa ating mga mag-aaral. Sa pamamagitan ng YAKAP, isinasakatuparan natin ang bisyon ng Pangulo na mabigyan ng kapanatagan ang mga magulang tungkol sa kalusugan ng kanilang mga anak bago pa man magsimula ang pasukan.”
Maaaring magparehistro sa YAKAP gamit ang eGov App o sa PhilHealth Local Health Insurance Offices (LHIOs).
